Velkomen til Gullvegen Gardstun – der gull og gardsliv blomstrar
Inn på tunet - Arena for meistring og glede
Ein trygg og meiningsfull kvardag – midt i naturen og historia på Lykling.
Gullvegen Gardstun er ein godkjent Inn på tunet-gard, og tilbyr tilrettelagte aktivitetar for barn, unge og vaksne med ulike behov. Her står meistring, trivsel og livsglede i sentrum – gjennom praktisk arbeid, dyrestell og kulturformidling.
Les meir
KontaktPå Gullvegen Gardstun får brukarar delta i gardslivet med sau, geit, skotsk høylandsfe, høns, gris og kaninar. Arbeidet spenner frå dyrestell og vedproduksjon til hagearbeid, matlaging og landskapspleie – alt forankra i lokal tradisjon og gullhistoria på Lykling.
Me samarbeider med kommunar, NAV og andre aktørar for å skape ein trygg og inkluderande arena for arbeidstrening og livsmeistring. Oppgåvene blir tilpassa den enkelte sine behov og funksjonsevne, og dyra spelar ei viktig rolle i empatitrening og sosial utvikling.
Gullvegen Gardstun er stolte av å vere den første godkjente Inn på tunet-garden i Bømlo kommune.
Tilbodet rettar seg mot:
- Skule og oppvekst
- Intregrering og "Vegen til lokalsamfunnet"
- Psykisk helse og arbeidstrening
Kva er Inn på tunet?
Inn på tunet er kvalitetssikra velferdstenester på gard, der aktivitetane gir meistring, utvikling og meiningsfylt arbeid. Forskning viser at kontakt med dyr, natur og praktiske oppgåver kan styrka både fysisk og psykisk helse.
Vil du vite meir om tilbodet eller samarbeid? Ta kontakt – me lyttar og finn gode løysningar saman.
Farmen på Gullvegen
Vil de samla gjengen til ei oppleving utanom det vanlege – med konkurransar og gardsliv?
Farmen på Gullvegen tilbyr teambuilding med aktivitetar inspirert av Farmen og Mesternes Mester. Her får de kjenna på gardslivet, konkurrera i klassiske øvingar og skapa minner saman. Passar perfekt for utdrikningslag og grupper som vil ha det gøy.
Les meir
KontaktVil de styrka samhald, le saman og oppleva noko heilt anna?
Gullvegen Gardstun tilbyr teambuilding og gardsopplevingar for både bedrifter og private grupper – med sauer i blikket, jord under støvlane og gull i horisonten. Her får de ein smak av gardslivet, og di eiga farmen - oppleving.
Me skreddarsyr opplegg som passar alt frå ulike bedritfssamlingar til utdrikningslag – med ein god dose humor og vestlandsk sjarm.
Tilbodet er tilgjengeleg vår, sommar og seinsommar
Når graset er grønt og sola skin (eller regnet duskar), står garden klar til å ta imot dykk. Me legg til rette for opplevingar som passar sesongen – frå vårens spirande energi til seinsommarens lune kveldar.
Praktisk info:
- Fastpris for grupper opp til 10 personar
- Tillegg per person ved større grupper
- Pris varierer etter aktivitetar, mat og opplegg
- Me tilpassar etter dykkar ynskje – frå rolege stunder til full Farmen-konkurranse
Ta kontakt for meir informasjon, pris og idémyldring – me gler oss til å skapa ei oppleving som passar akkurat dykk!
Historia
Gullvegen Gardstun ligg midt i eit landskap forma av både naturkrefter og menneskehender.
Her på Lykling møtest geologien si gullrike historie og livet til fiskarbøndene som har levd av hav, jord og lynghei. Garden er ein levande del av dette kulturlandskapet – eit tun der fortid og notid går hand i hand.
Gardshistoria vår «frå fiskarbonde til besøksgard»
Gullvegen Gardstun er ein gard utanom det vanlege. Her på Lykling blir historia om gull, gardsliv og kystkultur levandegjort – ei reise som starta på 1820-talet.
Frå los til landbruk
Plasseringa på Lykling gjorde garden perfekt for ein skipslos. Det var grunnen til at «Aslak Los», som han vart kalla, busette seg her. På speidarhaugen kunne han sjå vestover mot havet og speida etter seglskuter med losflagget heist – skip som trong hjelp frå ein lokalkjent los i dei krevjande farvatna langs vestkysten.
Familien kjem til gards
I 1861 kom Sindre si familie til garden – starten på generasjonshistoria på Gullvegen Gardstun. Tipp-tippoldefaren Thor Olsen kjøpte bruk nr. 2 og 3 på Lykling og flytta hit med familien frå Teigland på Moster. Her kunne han kombinera fiske og jordbruk, og han fekk mellom anna sønene Ola (f. 1861) og Lars (f. 1863). Ola overtok bruk nr. 2, som i dag er Urastølen, medan Lars tok over bruk nr. 3 – det som i dag er Gullvegen Gardstun, tidlegare kalla Markaplasset.
Gullfeber og gruvegangar
På 1880-talet nådde gullfeberen også garden. Mellom 1882 og 1898 vart det skjerpa og leita etter gull her. Gruvegangane på garden vart kalla opp etter Harald Hårfagre, og den store kvartsåra i Harald Hårfagre-gangen vart bora og sprengt i. Drifta vart leia av Maren Elisabeth Jonassen – kjend som Madam Jonassen – ein hotelleigar frå Haugesund som slo seg opp som gruveeigar. Ho var også involvert i Haugesundsgangen, ei av dei mest gullrike gruvene på Lykling.
Amerika og avgjersler
På 1880-talet reiste Lars til Amerika og arbeidde blant anna for Standard Oil i Chicago. Fleire familiemedlemmar emigrerte, og på 1890-talet prøvde han å overtala kona Karoline til å flytta med han. Men ho ville ikkje ta den lange sjøreisa med små born – ei avgjersle som førte til at dei overtok og busette seg på garden i 1901.
Kvinner i gardsdrifta
Lars og Karoline fekk sonen Thor (f. 1904), Sindre sin oldefar, som overtok garden i 1938. Han flytta hit med kone og tre døtrer frå Kammaren. Sindre si bestemor, Laura Karoline – «Besso» – var sterkt delaktig i gardsdrifta. Ho rodde morgon og kveld ut til Lyklingholmen for å mjølka kyrne, i all slags vestlandsvêr. Ho stod på til ho gifta seg med Sindre sin bestefar, Andreas Larsen – «Bessen» – og dei busette seg i Setramyro.
Neste generasjonar
I 1955 vart Sindre sin far, Thor Audun, fødd. Han hadde eit nært forhold til sin bestefar og overtok garden i 1974. Saman med Sindre si mor, Marit Johanne frå Jæren, utvikla dei garden vidare. Inspirert av gulltida bygde dei gullvaskeleiren på slutten av 1980-talet, ved Harald Hårfagre-gangen.
Gullvegen i dag
Sindre er yngste son og sjette generasjon på garden, og skal no overta drifta og utviklinga av Gullvegen Gardstun. Saman med sambuaren Runa ynskjer han å vidareformidla tradisjonane, historia og kulturen – og skapa ein plass for alle. Her skal dei skriva neste kapittel i boka om familien på Gullvegen.
Kjøpet av "Haga-tunet" – eit nytt kapittel
I 2020 tok Sindre og sambuaren Runa eit viktig steg vidare i utviklinga av Gullvegen Gardstun. Våren 2020 overtok dei garden Uren – gardsnummer 135/1 på Lykling – på folkemunne kalla «Haga-jorda» eller «Haga-tunet». Dette er ein heilt unik eigedom med gullgruveområde, klebersteinbrot, eit autentisk tun med bygningar frå 1800-talet, strandlinje med kai, og landbrukseigedom med beite og utmark.
Haga-tunet ligg som nabogard til dagens Gullvegen Gardstun, og passar som hand i hanske for vidare satsing. Eigedomen opnar for nye moglegheiter innan både tradisjonell landbruksdrift og som besøksgard med fokus på kulturformidling, Inn på tunet-aktivitetar og reiseliv.
Visjonen er klar: å vera ein positiv aktør for Lykling, Bømlo kommune og regionen – og å skapa ein unik besøksplass for både tilreisande og bygdefolk. Sindre og Runa har stor tru på konseptet, på historia og på framtida. Dette er berre starten – stein for stein blir Gullvegen bygd vidare.
Gulltida på Lykling - Norges svar på Klondike
Sunnhordland GeoparkPå slutten av 1800-talet eksploderte gullfeberen på Lykling. Kvartsårene i berga ned mot havet inneheldt gullklumpar som overgjekk alt engelske ingeniørar hadde sett i California og Australia. I 1883 vart det funne ein stein med ein halv kilo gull – Som skapte sensasjon bølger innanlands og utenlands, og aviser som Dagbladet skreiv at Bømmeløya kunne bli «ein verksemd utan sidestykke hertillands».
Men eventyret starta lenge før. I 1862 fann ein gjetargut den første gullklumpen ved ein tilfeldighet. Det tok 20 år før feberen braut laus. Frå 1882 til 1910 vart det drive gruvedrift i stor stil, med fleire hundre arbeidarar og over 200 kilo gull utvunne. På det meste vart det meldt inn over 1200 funn til lensmannen i Finnås.
Tre store selskap – hovudsakeleg finansiert av engelskmenn – og ei rekke enkeltmannsføretak snudde den vesle bygda på hovudet. To hotell, eit hotellskip, bakeri og sjapper vaks fram rundt gruvedrifta. Lykling vart eit pulserande sentrum for gulljakt og håp.
Gullvegen Gardstun formidlar denne historia – med levande forteljingar, gullvaskeleir og innblikk i det som ein gong var Noregs største gulleventyr.
I dag er Lykling og Gullvegen ein partner av Sunnhordland UNESCO Global Geopark – som løftar fram den geologiske og kulturhistoriske verdien av området. Her kan du oppleva historia der ho faktisk skjedde, og sjå spor etter både gullgruver og menneske som levde tett på naturen.
