Ny profil for destinasjon Gullvegen

Me er stolte av å presentere vår nye profil for destinasjon Gullvegen! Med Gullvegen som overordna destinasjon blir både Gullvegen Gardstun og Stormhyttene samla i eitt konsept. To ulike opplevingar med eit felles mål: å gje deg nærleik til naturen og møte med historia.

Gullet i logoen knyt oss til den rike gullhistoria på Lykling, men òg framover mot dei verdiane me vil byggje på. Gullårene som går igjen i uttrykket symboliserer stien som bind saman opplevingane våre, og minner oss om at Gullvegen skal vere ein gyllen veg for både små og store.

Me er stolte av at Gullvegen ligg på Bømlo, og har difor teke med Siggjo inn i logoen. Som offisiell samarbeidspartnar med Sunnhordland Unesco Geopark, er me med på å løfta fram den unike geo-arven vår, ei historie om stein, landskap og liv gjennom tusenvis av år.

Gullvegen er difor ikkje berre ein stad, men ein destinasjon der minner blir skapte og der gullet finst i både landskapet, forteljingane og møta mellom menneske! Me håpar de blir like glad i den nye profilen som me er.